દેશના ઘણા ભાગોમાં વરસાદ, કરા અને વાવાઝોડાનો દોર શરૂ થઈ ગયો છે. હવામાન વિભાગે સોમવારે અરુણાચલ પ્રદેશ, આસામ અને મેઘાલયમાં ભારે વરસાદનું એલર્ટ જાહેર કર્યું છે. બિહાર, ઉત્તર પ્રદેશ, છત્તીસગઢ સહિત 18 રાજ્યોમાં વાવાઝોડું, વીજળી અને કરા પડવાની સંભાવના છે.

પશ્ચિમ બંગાળ, ઝારખંડ અને ઉત્તરાખંડમાં કેટલાક સ્થળોએ 50-60 કિલોમીટર પ્રતિ કલાકની ઝડપે તેજ પવનોનું એલર્ટ છે. બિહાર, હિમાચલ પ્રદેશ, જમ્મુ-કાશ્મીર, ઓડિશા, સિક્કિમ અને ઉત્તર પ્રદેશમાં વીજળીના કડાકા સાથે 40-50 કિમી/કલાકની ઝડપે વાવાઝોડું ફૂંકાઈ શકે છે.

દિલ્હીમાં રવિવારે સવારની શરૂઆત હળવા વરસાદથી થઈ. જેનાથી લોકોને ગરમીથી થોડી રાહત મળી. પંજાબ અને હરિયાણાના ઘણા વિસ્તારોમાં પણ વરસાદ થયો. અમૃતસરમાં મહત્તમ તાપમાન 21.8°C અને પટિયાલામાં 26.6°C રહ્યું, જે સામાન્ય કરતાં લગભગ 4 ડિગ્રી ઓછું છે.

રાજસ્થાનના ઉત્તરીય વિસ્તારોમાં પણ હળવો વરસાદ અને ઝરમર વરસાદ થયો. સિક્કિમના ઘણા વિસ્તારોમાં રવિવારે મોડી સાંજે વાવાઝોડા સાથે ધોધમાર વરસાદ થયો. ઘણી જગ્યાએ મોટા-મોટા વૃક્ષો અને વીજળીના થાંભલા પણ પડી ગયા. રકડોંગ કાફર વિસ્તારમાં વૃક્ષ પડવાથી એક મહિલાનું મૃત્યુ થયું.

આ તરફ, ઓડિશાના મયુરભંજ જિલ્લામાં રવિવારે એક વિશાળ વાવાઝોડાએ ભારે તબાહી મચાવી. આ ઘટનામાં બે લોકોના મોત થયા, જ્યારે 25 થી વધુ લોકો ઘાયલ થયા. તેજ વાવાઝોડાને કારણે 70 થી વધુ ઘરોને નુકસાન થયું છે.

કાશ્મીર, ઉત્તરાખંડ અને હિમાચલ પ્રદેશમાં હિમવર્ષા

કાશ્મીર, ઉત્તરાખંડ અને હિમાચલ પ્રદેશના ઊંચાઈવાળા વિસ્તારોમાં રવિવારે હિમવર્ષા થઈ. હિમવર્ષાના કારણે શ્રીનગર-લેહ નેશનલ હાઈવેને બંધ કરવો પડ્યો. હવામાન વિભાગના જણાવ્યા અનુસાર, કાશ્મીર અને હિમાચલમાં 21 માર્ચ સુધી હળવો વરસાદ અને હિમવર્ષા થવાની સંભાવના છે.