પ્રાપ્ત માહિતી અનુસાર, થિયેટરના પ્રોજેક્ટર રૂમના પાછળના ભાગે આવેલી ઇલેક્ટ્રિકલ લાઇનમાં શોર્ટ સર્કિટ થવાના કારણે આગ લાગી હોવાનું પ્રાથમિક તારણ સામે આવ્યું છે. શોર્ટ સર્કિટ થયા બાદ જોતજોતામાં આગે વિકરાળ સ્વરૂપ ધારણ કરી લીધું હતું અને આખા પરિસરમાં કાળા ધુમાડાના ગોટેગોટા દૂર સુધી જોવા મળ્યા હતા. આગની ગંભીરતાને ધ્યાનમાં રાખીને અંકલેશ્વર DPMC સહિત આસપાસના વિસ્તારમાંથી 3થી 4 ફાયર બ્રિગેડની ટીમો તાત્કાલિક ઘટનાસ્થળે દોડી આવી હતી.

ફાયર ફાયટરોએ સતત પાણીનો મારો ચલાવીને આશરે બે કલાકની ભારે જહેમત બાદ આગ પર સંપૂર્ણ કાબૂ મેળવ્યો હતો. જોકે, આ દુર્ઘટનામાં રાજહંસ સિનેમાનું નંબર-૩ થિયેટર સંપૂર્ણપણે બળીને ખાખ થઈ ગયું છે. ઘટનાની જાણ થતાં જ DYSP અને GIDC પોલીસ સ્ટેશનના PI સહિતનો ઉચ્ચ પોલીસ કાફલો પણ ઘટનાસ્થળે પહોંચી ગયો હતો અને પરિસ્થિતિ પર કાબૂ મેળવ્યો હતો.

હાલમાં ફાયર વિભાગ દ્વારા આગ પર કાબૂ મેળવી લેવાયો છે. પોલીસ અને સંબંધિત તંત્ર દ્વારા આગ લાગવાના ચોક્કસ કારણોની ખાતરી કરવા તેમજ સિનેમા ગૃહને થયેલા આર્થિક નુકસાનનો સચોટ અંદાજ મેળવવા માટે આગળની કાનૂની તપાસ હાથ ધરવામાં આવી છે.