દુકાનો 24 કલાક ખુલ્લી રાખી શકાશે, પરંતુ તેનો અર્થ કર્મચારીઓ પાસેથી સતત કામ લઈ શકાશે એવો નથી. કર્મચારીઓના કામના કલાકો, રજા અને સલામતી સહિતના કાયદાકીય હકોની જોગવાઈ યથાવત્ રહેશે. ગુમાસ્તા કાયદા હેઠળ દુકાનો અને વ્યાવસાયિક એકમોની નોંધણીની પ્રક્રિયા પણ સરળ કરવામાં આવી છે. હવે સેલ્ફ ડિક્લેરેશન અને સેલ્ફ-સર્ટિફાઇડ દસ્તાવેજોના આધારે નોંધણી માટે અરજી કરી શકાશે. નોંધણીની પ્રક્રિયામાં ઇન્સ્પેક્ટરની ભૂમિકા દૂર કરવાની જોગવાઈ પણ કરવામાં આવી છે. આ ફેરફારથી વેપારીઓને નોંધણી માટે થતી લાંબી સરકારી પ્રક્રિયામાંથી રાહત મળશે.

રાજ્ય સરકારે જમીન મહેસૂલ કોડમાં પણ મહત્વનો સુધારો કર્યો છે. ચોક્કસ શરતો પૂરી થતી હોય તેવા રજિસ્ટર્ડ વેચાણ દસ્તાવેજના કિસ્સામાં મ્યુટેશન એન્ટ્રી એટલે કે નામચઢતરની કાર્યવાહી એ જ દિવસે નોંધાવીને પ્રમાણિત કરી શકાશે. હાલમાં જમીનના વ્યવહાર બાદ હિત ધરાવતા લોકોને નોટિસ આપવી અને વાંધા રજૂ કરવા માટે સમય આપવાની પ્રક્રિયાના કારણે નામચઢતરમાં વિલંબ થતો હતો. હવે જે જમીનના સોદામાં કોઈ વિવાદ ન હોય અને નક્કી કરેલી શરતો પૂર્ણ થતી હોય ત્યાં આ પ્રક્રિયા ઝડપી બનશે.

સરકારે ‘ટુકડા જમીન ધારા-1947’માં પણ મહત્વનો સુધારો કર્યો છે. 29 જાન્યુઆરી, 1948થી 31 માર્ચ, 2026 દરમિયાન કાયદાની જોગવાઈઓના ભંગ સાથે થયેલા જમીનના વિભાજન અથવા ટ્રાન્સફરના વ્યવહારોને દંડ કે પ્રીમિયમ વસૂલ્યા વગર નિયમિત કરવાની જોગવાઈ કરવામાં આવી છે. આ સુધારાથી ખાસ કરીને શહેરી વિસ્તારોમાં વારસાગત વિભાજનના કારણે બનેલા જમીનના નાના ટુકડાઓના માલિકોને રાહત મળશે. આવા ટુકડાઓ માટે બિનખેતી ઉપયોગની મંજૂરી મેળવવામાં અત્યાર સુધી પડતી મુશ્કેલીઓ દૂર કરવાનો માર્ગ ખુલશે. આ પ્રકારના વ્યવહારોને લગતા પડતર કેસો રદ કરવાની જોગવાઈ પણ કરવામાં આવી છે. સાથે જ સ્થાનિક પરિસ્થિતિને ધ્યાનમાં રાખીને જમીન માટે ‘સ્ટાન્ડર્ડ એરિયા’ નક્કી કરવાની સત્તા સરકારને આપવામાં આવશે.