રાજ્ય સરકાર દ્વારા જાહેર કરવામાં આવેલા નવા ભાડા માળખા મુજબ, હવેથી રીક્ષામાં મુસાફરી કરવા માટે પ્રથમ 1.2 કિલોમીટર સુધી ₹25નું લઘુત્તમ ભાડું નક્કી કરવામાં આવ્યું છે, જે અગાઉ ₹10 હતું. પ્રથમ 1.2 કિલોમીટરની મુસાફરી બાદ પ્રતિ કિલોમીટર ₹20 પ્રમાણે ચાર્જ ગણવામાં આવશે. વધુમાં, મીટર રીડિંગની ગણતરી સરળ બનાવવા માટે દર 200 મીટરના અંતર માટે ₹4નો વધારાનો ચાર્જ નક્કી કરવામાં આવ્યો છે.

આ ભાડા વધારા ઉપરાંત રાત્રિના સમયે મુસાફરી કરનારા લોકો માટે ખાસ દરો નક્કી કરાયા છે. રાત્રે 11:00 વાગ્યાથી સવારના 5:00 વાગ્યા સુધીના સમયગાળા દરમિયાન નિયમિત ભાડા પર 50% વધારાનો રાત્રિ ચાર્જ લાગુ પડશે. આ સાથે જ રીક્ષાના ભાડા માળખામાં વેઇટિંગ ચાર્જનો પણ સમાવેશ કરી દેવામાં આવ્યો છે, જેથી રીક્ષાચાલકોને ટ્રાફિક કે રોકાણ દરમિયાન થતા નુકસાન સામે રાહત મળી રહે.

મોંઘવારી અને ઈંધણના ભાવમાં થયેલા વધારા સામે ઓટોરીક્ષા ચાલક યુનિયનો દ્વારા ભાડા વધારા માટે રજૂઆતો કરવામાં આવી રહી હતી. સરકારે આ માંગણીઓને ધ્યાને રાખીને નવા દર મંજૂર કરતાં રીક્ષાચાલકોની આર્થિક સ્થિતિમાં સુધારો થશે. બીજી તરફ, આજથી જ નવા ભાડા દરો અમલી બની જતાં દૈનિક રીક્ષામાં મુસાફરી કરતા નાગરિકોના ખિસ્સા પર આ ભાડા વધારાની સીધી અસર જોવા મળશે.