મૂળ મધ્યપ્રદેશનો 24 વર્ષીય યુવક અમદાવાદના પાલડી વિસ્તારમાં PGમાં રહે છે અને એક કંપનીમાં ટ્રેઇની તરીકે કામ કરે છે. ગત જુલાઈ મહિનામાં તેણે Instagram પર એક Sponsored Advertisement જોઈ હતી. તેમાં નજીકમાં રહેતી યુવતી સાથે વાતચીત અને મુલાકાત માટે સંપર્ક કરવાની માહિતી આપવામાં આવી હતી. જાહેરાતમાં આપેલા નંબર પર યુવકે ફોન કરતાં સામેવાળાએ પોતાનું નામ હુકમસિંગ હોવાનું જણાવ્યું હતું. યુવકે સર્વિસ અંગે માહિતી મેળવી રસ દાખવતાં તેની પાસેથી ₹500 રજિસ્ટ્રેશન ફી લેવામાં આવી હતી.

રજિસ્ટ્રેશન બાદ સામેવાળાએ યુવકને ચારથી પાંચ યુવતીના ફોટોગ્રાફ મોકલ્યા હતા. યુવકે તેમાંથી એક યુવતી પસંદ કરી હતી અને તેને પાલડીની એક હોટલમાં મોકલવા માટે જણાવ્યું હતું. યુવક હોટલ પહોંચ્યા બાદ તેણે યુવતીનો સંપર્ક કર્યો હતો. ફરિયાદ મુજબ, યુવતી તરફથી મુલાકાત ચાર્જ અને રૂમના ભાડા સહિતના ખર્ચ પેટે ₹14 હજારની માંગણી કરવામાં આવી હતી. યુવકે આ રકમ ચૂકવ્યા બાદ તેની પાસેથી વધુ રકમની માંગણી શરૂ થઈ હતી.

ફરિયાદ મુજબ, ત્યારબાદ યુવક પાસેથી મેડિકલ, રેસ્ક્યૂ અને એક્ટિવેશન સહિતના અલગ-અલગ ચાર્જના નામે નાણાં માગવામાં આવ્યા હતા. દરમિયાન સમય વધુ થઈ જતાં યુવકે સર્વિસ કેન્સલ કરવાનો નિર્ણય લીધો હતો. આ પછી આરોપીએ બીજા દિવસે રિફંડ આપી દેવાની વાત કરી હતી. જોકે, રિફંડ આપવાના બહાને પણ અલગ-અલગ ચાર્જ વસૂલવાનું ચાલુ રાખ્યું હતું. આ રીતે યુવક પાસેથી ટુકડે-ટુકડે કુલ ₹9.50 લાખની રકમ પડાવી લેવામાં આવી હોવાનો આક્ષેપ છે.

પોતાની સાથે સાયબર ફ્રોડ થયો હોવાની જાણ થતાં યુવકે સૌપ્રથમ સાયબર હેલ્પલાઇનનો સંપર્ક કર્યો હતો. ત્યારબાદ તેણે સાયબર ક્રાઇમ પોલીસમાં ફરિયાદ નોંધાવી હતી. ફરિયાદના આધારે પોલીસે ગુનો નોંધી સમગ્ર મામલે તપાસ શરૂ કરી છે. પોલીસે Instagram પરની Sponsored Adથી શરૂ થયેલા સંપર્કથી લઈને નાણાંની લેવડદેવડ સુધીના સમગ્ર ઘટનાક્રમની તપાસ હાથ ધરી છે.