બ્લડ પ્લાઝ્મા કૌભાંડમાં ચોંકાવનારા ખુલાસા, મોટી બ્લ્ડ બેંકોની પણ સંડોવણી આવી શકે છે સામે

તપાસમાં ખુલ્યું છે કે, છેલ્લા છ મહિનામાં 114થી વધુ ડુપ્લિકેટ અથવા ભેળસેળયુક્ત પ્લાઝ્મા યુનિટ સપ્લાય કરવામાં આવ્યા હતા. પોલીસના જણાવ્યા મુજબ નકલી પ્લાઝ્માનો એક યુનિટ અંદાજે ₹5 હજારના ભાવે વેચવામાં આવતો હતો. આ પ્લાઝ્મા ખરીદી કરનાર હોસ્પિટલોમાં સપ્લાય અને ફાર્મા કંપનીઓ સાથે થયેલા ટ્રાન્ઝેક્શનની હાલ સઘન તપાસ ચાલી રહી છે.

સમગ્ર કૌભાંડ ત્યારે સામે આવ્યું જ્યારે અમેરિકાની ફૂડ એન્ડ ડ્રગ એડમિનિસ્ટ્રેશન (USFDA) દ્વારા અમદાવાદની એક પ્રતિષ્ઠિત ફાર્મા કંપની દ્વારા મોકલાયેલા પ્લાઝ્માના સેમ્પલ રિજેક્ટ કરવામાં આવ્યા હતા. ફાર્મા કંપનીએ આ પ્લાઝ્મા વિદેશમાં સપ્લાય માટે મોકલ્યો હતો. સેમ્પલ ફેઇલ થતાં તેની પાછળની સપ્લાય ચેઇનની તપાસ શરૂ કરવામાં આવી અને ડુપ્લિકેટ પ્લાઝ્મા રેકેટનો પર્દાફાશ થયો. અમદાવાદ ગ્રામ્ય પોલીસ હવે મહારાષ્ટ્ર પોલીસ અને આરોગ્ય વિભાગ સાથે સંયુક્ત તપાસ કરી રહી છે. સાથે જ ગુજરાતની કોઈ બ્લડ બેન્ક આ રેકેટ સાથે સંકળાયેલી છે કે નહીં તે મુદ્દે પણ તપાસનો વ્યાપ વધારવામાં આવ્યો છે. રાજ્યની આશરે 700 જેટલી બ્લડ બેન્કમાં સ્ટાન્ડર્ડ ઓપરેટિંગ પ્રોસિજર (SOP) મુજબ કામગીરી થાય છે કે કેમ તેની પણ સમીક્ષા હાથ ધરવામાં આવી છે. આ અંગેનો વિગતવાર અહેવાલ ટૂંક સમયમાં DGPને સોંપવામાં આવશે.