પોલીસના સત્તાવાર નિવેદન મુજબ, 7 ઓગસ્ટ, 2026ના રોજ સાંજના આશરે 5:30થી 6:00 વાગ્યાના સમયગાળા દરમિયાન ટ્રાફિક વિભાગના પોલીસ ઇન્સ્પેક્ટર બ્રહ્મભટ્ટ તથા તેમની ટીમ સુરત રેલવે સ્ટેશન અને આસપાસના વિસ્તારમાં ટ્રાફિક પેટ્રોલિંગ કરી રહી હતી. આ દરમિયાન એક વાહન જાહેર રસ્તા પર પાર્ક કરાયેલું જોવા મળ્યું હતું. ટ્રાફિક પોલીસના જણાવ્યા પ્રમાણે, વીડિયોમાં દેખાતી કાર આશરે એક કલાકથી જાહેર રસ્તા પર પાર્ક કરવામાં આવી હતી. વાહન એવી જગ્યાએ ઊભું રાખવામાં આવ્યું હતું જ્યાં પાર્કિંગને કારણે ટ્રાફિકની અવરજવરમાં અડચણ ઊભી થઈ રહી હતી. પોલીસ ટીમ દ્વારા વાહનચાલકને વાહન હટાવવા અંગે સમજાવવામાં આવ્યું હોવા છતાં સ્થિતિ યથાવત રહેતાં ટ્રાફિક વ્યવસ્થા જાળવવા માટે ક્રેન બોલાવવામાં આવી હતી. ત્યારબાદ નિયમ મુજબ વાહન સામે કાયદેસરની દંડાત્મક કાર્યવાહી હાથ ધરવામાં આવી હતી.

વાયરલ વીડિયોને લઈને ટ્રાફિક પોલીસનું કહેવું છે કે સોશિયલ મીડિયા પર વીડિયો વાયરલ થતાં લોકોમાં પોલીસની કામગીરી અંગે ગેરસમજ ઊભી થઈ હતી. પરંતુ સમગ્ર ઘટનાની તપાસ બાદ પોલીસ દ્વારા જણાવવામાં આવ્યું છે કે વાહન સામેની કાર્યવાહી કોઈ મનસ્વી નિર્ણય નહોતો. પોલીસના જણાવ્યા મુજબ, ટ્રાફિક નિયમોના ભંગ અને જાહેર માર્ગ પર લાંબા સમય સુધી વાહન પાર્ક કરીને ટ્રાફિકમાં અડચણ ઊભી કરવાના કારણે ક્રેન મારફતે વાહન હટાવવાની કાર્યવાહી કરવામાં આવી હતી. ટ્રાફિક વિભાગે સ્પષ્ટ કર્યું છે કે નિયમો દરેક વાહનચાલક માટે સમાન છે અને કોઈપણ વ્યક્તિને જાહેર રસ્તા પર મનફાવે તે રીતે વાહન પાર્ક કરવાની છૂટ આપી શકાય નહીં.