અમેરિકન વિદેશ વિભાગના પ્રવક્તા ટોમી પિગોટે કહ્યું કે, સરકાર એવા લોકોની ઓળખ કરી રહી છે, જેઓ થોડા સમય માટે અમેરિકા આવવાનું કહીને દેશમાં પ્રવેશ્યા હતા, પરંતુ બાદમાં કાયમી ધોરણે રહેવા માટે અસાઇલમની અરજી કરી હતી. વિઝા રદ થવાનો અર્થ એ જરૂરી નથી કે સંબંધિત વ્યક્તિને તરત જ અમેરિકાની બહાર કાઢી મૂકવામાં આવશે. જે લોકોના અસાઇલમના કેસ પહેલેથી જ પેન્ડિંગ છે, તેમની સ્થિતિ અલગ રીતે નક્કી કરવામાં આવી શકે છે. તેઓ બિઝનેસ અથવા પ્રવાસી વિઝા ધારક તરીકે અમેરિકામાં નહીં રહી શકે.

B1 વિઝા સામાન્ય રીતે વ્યવસાયિક પ્રવાસ માટે અને B2 વિઝા પ્રવાસન, પરિવારને મળવા અથવા સારવાર જેવા કામો માટે આપવામાં આવે છે. હાલમાં આ વિઝા માટે અરજી કરનારા લોકોએ એ સાબિત કરવું પડે છે કે તેમનો અમેરિકામાં કાયમી ધોરણે રહેવાનો ઇરાદો નથી અને તેઓ પોતાના દેશમાં પરત ફરશે. ટ્રમ્પ પહેલેથી જ આવા વિઝાને લઈને કડક વલણ ધરાવે છે. અરજદારો પાસેથી સોશિયલ મીડિયા પ્રવૃત્તિઓ વિશે વધુ માહિતી માગવામાં આવી રહી છે અને કેટલાક કિસ્સાઓમાં મોંઘા બોન્ડની વ્યવસ્થા પણ કરવામાં આવી છે. ઘણા દેશોના નાગરિકો માટે વિઝા પર પ્રતિબંધો પણ મૂકવામાં આવ્યા છે. છેલ્લા 18 મહિનામાં અમેરિકા લગભગ 1.75 લાખ વિઝા પહેલેથી જ રદ કરી ચૂક્યું છે. તેમાં ગુનાના આરોપી અથવા દોષિત લોકોની સાથે એવા કેટલાક લોકો પણ સામેલ છે, જેમણે અમેરિકાની નીતિઓ, ખાસ કરીને મધ્ય-પૂર્વ સાથે જોડાયેલા મુદ્દાઓ પર જાહેરમાં ટીકા કરી હતી.