સુરત સિવિલ હોસ્પિટલમાં વધુ એક રેગિંગની ફરિયાદથી તંત્ર એલર્ટ: સર્જરી વિભાગના રેસિડેન્ટ ડોક્ટરોને હેરાનગતિનો આક્ષેપ

મળતી માહિતી મુજબ, ગત 27 ઓગસ્ટની સાંજે સુરત સિવિલ હોસ્પિટલના ડીન કાર્યાલયને સર્જરી વિભાગને લગતી નનામી અરજી મળી હતી. અરજીમાં રેસિડેન્ટ ડોક્ટરોને વધુ કામ કરાવવામાં આવતું હોવાનો આક્ષેપ કરવામાં આવ્યો હતો. સાથે જ રજા મળતી ન હોવા અને કામના ભારણના કારણે અભ્યાસ પર અસર થતી હોવાની ફરિયાદ પણ કરવામાં આવી હતી. આ ઉપરાંત સિનિયર દ્વારા હેરાન કરવામાં આવતા હોવાના આક્ષેપો પણ અરજીમાં કરવામાં આવ્યા હતા. રેસિડેન્ટ ડોક્ટર હર્ષ પંડ્યાના આપઘાત બાદ રેગિંગના મુદ્દે સિવિલ હોસ્પિટલનું તંત્ર પહેલેથી જ એલર્ટ છે. આવી સ્થિતિમાં સર્જરી વિભાગમાંથી મળેલી નનામી અરજીને તંત્રએ ગંભીરતાથી લીધી હતી.

ફરિયાદ મળતાની સાથે જ સંબંધિત વિભાગના અધિકારીઓ અને જવાબદાર તબીબી અધિકારીઓ સાથે બેઠક યોજવામાં આવી હતી. નનામી અરજી મળતા એન્ટી રેગિંગ કમિટી સક્રિય ફરિયાદની ગંભીરતા જોતા સિવિલ હોસ્પિટલ તંત્ર દ્વારા તાત્કાલિક એન્ટી રેગિંગ કમિટીની બેઠક બોલાવવામાં આવી હતી. બેઠકમાં અરજીમાં કરવામાં આવેલા આક્ષેપો અંગે ચર્ચા કરવામાં આવી હતી. રેસિડેન્ટ ડોક્ટરો સાથે વાતચીત તેમજ વિભાગની કામગીરી અને સિનિયર-જુનિયર વચ્ચેના વ્યવહાર અંગે પણ ચર્ચા કરવામાં આવી હતી. મોડી રાત સુધી ચાલેલી બેઠકમાં સમગ્ર મામલાની વિગતો મેળવવાનો પ્રયાસ કરવામાં આવ્યો હતો. કમિટી દ્વારા તપાસ બાદ હાલમાં રેસિડેન્ટ ડોક્ટર સાથે રેગિંગ થયું હોવાના કોઈ ચોક્કસ પુરાવા મળ્યા ન હોવાનું જણાવવામાં આવ્યું છે.

રેસિડેન્ટ ડોક્ટરમાં એક પ્રકારનો ડર હોવાની વાત સિવિલ તંત્રના જણાવ્યા મુજબ, સમગ્ર મામલે રેસિડેન્ટ ડોક્ટરોમાં એક પ્રકારનો ડર અથવા અસ્વસ્થતા હોવાનું જણાયું હતું. જોકે, અધિકારીઓ સાથેની બેઠક અને ચર્ચા બાદ સ્થિતિ અંગે સંતોષ વ્યક્ત કરવામાં આવ્યો હોવાનું તંત્રનું કહેવું છે. સંબંધિત સમસ્યાઓ અંગે જરૂરી સમજણ અને ચર્ચા કરીને મામલાનું નિરાકરણ લાવવામાં આવ્યું હોવાનો દાવો કરવામાં આવ્યો છે. ફરિયાદમાં રજા, કામના ભારણ અને અભ્યાસને લઈને ઉઠાવવામાં આવેલા મુદ્દાઓને પણ તંત્ર દ્વારા ધ્યાનમાં લેવામાં આવ્યા છે. રેસિડેન્ટ ડોક્ટરો પર કામનું યોગ્ય વિતરણ થાય અને તેમની શૈક્ષણિક કામગીરીને અસર ન થાય તે દિશામાં પણ ચર્ચા કરવામાં આવી હોવાનું જાણવા મળે છે.

હર્ષ પંડ્યાના આપઘાત બાદ રેગિંગ મુદ્દે ખાસ સતર્કતા સુરત સિવિલ હોસ્પિટલમાં રેસિડેન્ટ ડોક્ટર હર્ષ પંડ્યાના આપઘાતની ઘટના બાદ રેગિંગ અને રેસિડેન્ટ ડોક્ટરોની માનસિક સ્થિતિનો મુદ્દો સંવેદનશીલ બન્યો છે. આ ઘટનાના પગલે સિવિલ હોસ્પિટલ તંત્ર દ્વારા રેસિડેન્ટ ડોક્ટરોની ફરિયાદો અને તેમની મુશ્કેલીઓને ગંભીરતાથી લેવામાં આવી રહી છે. આ જ કડીમાં સર્જરી વિભાગમાંથી મળેલી નનામી અરજીને પગલે તંત્રએ કોઈ વિલંબ કર્યા વગર કાર્યવાહી શરૂ કરી હતી. નનામી અરજી હોવા છતાં તેની તપાસ કરવા માટે સંબંધિત અધિકારીઓની બેઠક બોલાવવામાં આવી અને ત્યારબાદ એન્ટી રેગિંગ કમિટીને પણ મામલાથી માહિતગાર કરવામાં આવી હતી. કમિટીનો દાવો: રેગિંગના પુરાવા મળ્યા નથી મોડી રાત સુધી ચાલેલી બેઠક બાદ એન્ટી રેગિંગ કમિટીએ પ્રાથમિક રીતે સ્પષ્ટ કર્યું છે કે રેસિડેન્ટ ડોક્ટર સાથે રેગિંગ થયું હોવાના કોઈ પુરાવા હાલ મળ્યા નથી. જોકે, ફરિયાદમાં ઉઠાવવામાં આવેલા કામના ભારણ, રજા અને અભ્યાસને લગતા મુદ્દાઓને તંત્રએ અવગણ્યા નથી. હવે આ સમગ્ર મામલે સિવિલ હોસ્પિટલ તંત્ર રેસિડેન્ટ ડોક્ટરો સાથે સંકલન રાખીને તેમની મુશ્કેલીઓનું નિરાકરણ લાવવાની દિશામાં આગળ વધશે.