મળતી માહિતી મુજબ, ડીંડોલીથી નેહા-48 તરફ પૂરઝડપે જઈ રહેલા આઇસર ટેમ્પાના ચાલકે અચાનક સ્ટીયરિંગ પરનો કાબૂ ગુમાવી દીધો હતો અને ટેમ્પો માર્ગ કિનારે આવેલા હાઇ ટેન્શન વીજ ટાવર સાથે જઈ અથડાયો હતો. જોરદાર ટક્કર વાગતા જ 60 KV ક્ષમતાનો આખો ટાવર કડાકાભેર નીચે ધરાશાયી થયો હતો. ટાવર તૂટી પડવાના કારણે તેના હાઇ ટેન્શન વાયરો નજીકમાં આવેલી રહેણાંક સોસાયટીના મકાનો પર આવી પડ્યા હતા. સદનસીબે આ ભયાનક બનાવમાં કોઈ જાનહાની નોંધાઈ નથી, જેથી મોટી દુર્ઘટના ટળી હતી.

અકસ્માત સર્જાયા બાદ ગભરાઈ ગયેલો આઇસર ટેમ્પા ચાલક ઘટનાસ્થળેથી ભાગી છૂટ્યો હતો. બનાવની જાણ થતાં જ સ્થાનિક પોલીસ કાફલો તેમજ વિસ્તારના નગરસેવકો તાત્કાલિક સ્થળ પર દોડી આવ્યા હતા અને પરિસ્થિતિ પર કાબૂ મેળવવાનો પ્રયાસ કર્યો હતો. ટાવર ધરાશાયી થવાના કારણે સમગ્ર વિસ્તારમાં વીજ પુરવઠો ખોરવાઈ ગયો હતો અને સ્થાનિક રહીશોમાં ગભરાટ વ્યાપી ગયો હતો.

બીજી તરફ, આટલી ગંભીર અને જોખમી ઘટના બની હોવા છતાં વીજ વિભાગના જવાબદાર અધિકારીઓ લાંબા સમય સુધી સ્થળ પર ન પહોંચતા સ્થાનિકોમાં ભારે રોષ જોવા મળ્યો હતો. ઘટનાસ્થળે પહોંચેલી પોલીસે ટેમ્પો કબજે કરીને ફરાર ચાલક સામે ગુનો નોંધી તેને ઝડપી પાડવા માટે તપાસ હાથ ધરી છે, તેમજ વીજ લાઇન રિપેરિંગની કામગીરી હાથ ધરવામાં આવી છે.