સુરત: વરાછા પોલીસે વેપારીની ઓટોરિક્ષામાં ભૂલાયેલી રૂ.1,87,000 રોકડ સહિતની બેગ શોધી પરત કરી. રાજસ્થાનના પુરણસિંગ સીસોદીયાની બેગ CCTV ફૂટેજની મદદથી મળી.
સુરત: સુરત શહેરમાં બહારગામથી ખરીદી કરવા આવતા વેપારીઓ સાથે ક્યારેક મુસાફરી દરમિયાન કિંમતી સામાન ભૂલાઈ જવાના બનાવો સામે આવતા હોય છે. આવા બનાવોમાં પોલીસ દ્વારા તાત્કાલિક કાર્યવાહી કરવામાં આવે તો મોટી નુકસાની ટાળી શકાય છે. ત્યારે વરાછા પોલીસની ટીમે એક વેપારીની ઓટોરિક્ષામાં ભૂલાઈ ગયેલી રૂ.1,87,000ની રોકડ સહિતની બેગ શોધી કાઢી તેને સહીસલામત પરત અપાવી માનવતાનું ઉત્તમ ઉદાહરણ પૂરું પાડ્યું છે.
મળતી માહિતી મુજબ, રાજસ્થાનના ઉદયપુર જિલ્લાના રહેવાસી અને હાલ મહેસાણા ખાતે રહી સાડીનો વ્યવસાય કરતા પુરણસિંગ મનોહરસિંગ સીસોદીયા સુરતમાં સાડીનો માલ ખરીદવા માટે આવ્યા હતા. 7 સપ્ટેમ્બર, 2026ના રોજ તેઓ સુરતના સરદાર માર્કેટથી ઓટોરિક્ષામાં બેસી બોમ્બે માર્કેટ તરફ ગયા હતા. બોમ્બે માર્કેટ ગેટ નંબર-4 પાસે પહોંચ્યા બાદ તેઓ ઓટોરિક્ષામાંથી ઉતરી ગયા હતા.
જોકે, ઉતાવળમાં તેઓ પોતાની એક બેગ ઓટોરિક્ષામાં જ ભૂલી ગયા હતા. વેપારીને થોડા સમય બાદ બેગ યાદ આવતા તેમાં શું સામાન હતો તે અંગે ચિંતા વધી હતી. કારણ કે બેગમાં કપડાં અને અન્ય વસ્તુઓ ઉપરાંત રોકડા રૂ.1,87,000 જેટલી મોટી રકમ પણ રાખેલી હતી.
વેપારી સીધા વરાછા પોલીસ સ્ટેશન પહોંચ્યા
બેગ ગુમ થયાની જાણ થતાં પુરણસિંગ સીસોદીયા વરાછા પોલીસ સ્ટેશન ખાતે પહોંચ્યા હતા અને સમગ્ર ઘટનાની જાણ પોલીસને કરી હતી. વેપારીએ પોલીસને જણાવ્યું હતું કે તેઓ સરદાર માર્કેટથી બોમ્બે માર્કેટ સુધી ઓટોરિક્ષામાં આવ્યા હતા અને બોમ્બે માર્કેટના ગેટ નંબર-4 પાસે ઉતર્યા બાદ બેગ રિક્ષામાં જ રહી ગઈ હતી. ઘટનાની ગંભીરતા ધ્યાનમાં લઈને વરાછા પોલીસ ઇન્સ્પેક્ટર એ.આર. વાળાએ મામલો તાત્કાલિક ધ્યાનમાં લીધો હતો. વેપારીની બેગમાં મોટી રોકડ રકમ હોવાથી પોલીસ દ્વારા પણ આ બાબતને ગંભીરતાથી લઈ બેગ શોધવા માટે સર્વેલન્સ ટીમને જરૂરી માર્ગદર્શન આપવામાં આવ્યું હતું.
CCTV ફૂટેજ બન્યું પોલીસ માટે મહત્વનું કડીરૂપ
પોલીસ સબ-ઇન્સ્પેક્ટર વી.ડી. માળીના માર્ગદર્શન હેઠળ સર્વેલન્સ ટીમના અ.હે.કો. વિજયસિંહ દેહાભાઈ અને અ.પો.કો. વાસુરભાઈ કાળુભાઈએ વેપારીને સાથે રાખી બોમ્બે માર્કેટ ગેટ નંબર-4 આસપાસના CCTV કેમેરાના ફૂટેજ તપાસવાનું શરૂ કર્યું હતું. પોલીસે વેપારી કઈ ઓટોરિક્ષામાં આવ્યા હતા તેની માહિતી મેળવવા માટે અલગ-અલગ CCTV કેમેરાના ફૂટેજ ચકાસ્યા હતા. સતત તપાસ બાદ પોલીસ ટીમને સંબંધિત ઓટોરિક્ષાની ઓળખ કરવામાં સફળતા મળી હતી. ઓટોરિક્ષાનો નંબર અને ચાલક અંગેની વિગતો મેળવ્યા બાદ પોલીસ ટીમે રિક્ષાચાલકનો સંપર્ક કર્યો હતો.
રિક્ષાચાલકે બેગ સાચવી રાખી હતી
પોલીસે ઓટોરિક્ષાચાલક સુનિલ શ્રીપાલ બગેલનો સંપર્ક કર્યો હતો. પૂછપરછ દરમિયાન જાણવા મળ્યું કે તેઓ સુરત શહેરમાં ઓટોરિક્ષા ચલાવી મુસાફરોને ભાડે લઈ જતા હતા. રિક્ષાચાલકે પોલીસને જણાવ્યું કે બોમ્બે માર્કેટનું ભાડું પૂર્ણ કર્યા બાદ તેઓ ડુમસ તરફ ભાડું લઈને ગયા હતા. દરમિયાન રિક્ષામાં એક બેગ પડી હોવાનું તેમના ધ્યાનમાં આવ્યું હતું. બેગ કોઈ મુસાફર ભૂલી ગયા હોવાનું જણાતા તેમણે બેગને પોતાની પાસે સહીસલામત રાખી હતી. પોલીસે વેપારીની ઓળખ અને બેગની વિગતોની ખાતરી કર્યા બાદ રિક્ષાચાલક પાસેથી બેગ મેળવી હતી. ત્યારબાદ બેગ વેપારી પુરણસિંગ સીસોદીયાને પરત કરવામાં આવી હતી.
