મળતી વિગતો અનુસાર, અમદાવાદ નારણપુરામાં રહેતી 38 વર્ષીય પરિણીતા વર્ષ 2014માં બાપુનગરની ફાયનાન્સ કંપનીમાં નોકરી કરતી હતી. તે સમયે તેની સાથે અંકિતા ઝાલા નામની યુવતી પણ નોકરી કરતી હોવાથી બંને વચ્ચે પારિવારિક સંબંધો બંધાયા હતા. વર્ષ 2020માં પરિણીતા તેના પતિ સાથે લો-ગાર્ડન ગઈ હતી ત્યારે અંકિતા અને તેના પતિ કલ્પેશ સાથે મુલાકાત થઈ હતી. અંકિતા અને કલ્પેશે મકાન લેવા લોનની ફાઈલ મૂકી હોવાનું કહીને 30 લાખની મદદ માંગી હતી. બે-ત્રણ મહિનામાં લોન મંજૂર થતાં રૂપિયા પરત કરવાની ખાતરી પણ આપી હતી. જોકે, આટલી મોટી રકમ મામલે પરિણીતાના પતિએ અસમર્થતા દર્શાવતા કલ્પેશે ક્રેડિટકાર્ડથી મદદ કરવા કહ્યું હતું.

એક અઠવાડિયા બાદ અંકિતા અને કલ્પેશે ભોગ બનનાર દંપતિને સીજી રોડની હોટલમાં જમવા આમંત્રણ આપ્યું હતું અને ખાસ કરીને ક્રેડિટકાર્ડ લઈને આવવા પણ કહ્યું હતું. જ્યારે ભોગ બનનાર દંપતિ હોટલ પર પહોંચ્યું ત્યારે અંકિતા ઝાલા અને તેના પતિ કલ્પેશ ઝાલાએ પરિણીતાના પતિ પાસેથી અલગ-અલગ બેંકના છ ક્રેડિટકાર્ડ લઈ લીધા હતા. બાદમાં તે કાર્ડ સ્વાઈપ કરીને અને બેંક મારફતે કુલ રૂ. 29.66 લાખ રૂપિયા મેળવી લીધા હતા.

થોડા સમય બાદ ઠગ દંપતિએ નાણાં ન ચૂકવતા બેંકમાંથી ઉઘરાણીના ફોન આવવા લાગ્યા હતા. બેંકના અધિકારીઓ ઘરે પણ ઉઘરાણી માટે પહોંચવા લાગ્યા હતા. આ મામલે અંકિતા અને કલ્પેશને જાણ કરતા માત્ર 8 લાખ રૂપિયા પરત આપ્યા હતા. બાકીના 21.66 લાખ રૂપિયા પરત ન આપીને ફોન ઉપાડવાનું બંધ કરી દીધું હતું. આમ, દેવું વધી જતા ભોગ બનનાર દંપતિની આર્થિક સ્થિતિ કથળી ગઈ હતી. જેથી આ મામલે પોલીસને અરજી આપતા નવરંગપુરા પોલીસે 21.66 લાખની છેતરપિંડી મામલે અંકિતા ઝાલા અને તેના પતિ કલ્પેશ ઝાલા સામે ગુનો નોંધી તપાસ હાથ ધરી છે.

ડિપ્રેશનમાં આવી ગયો પતિ, વિદેશમાં નોકરી કરવા મજબૂર